御宅青年 ~ 電車男?!

好唔容易, 先將電車男VCD睇完, 响屋企睇, 始終唔係太專心, 係都要將兩隻vcd分開嚟睇...

初頭以為, 講嚟講去, 又咪係講個傻仔, 响互聯網度留連, 唔同其他人有太多接觸同溝通, 以為有d悶.  後嚟, 到而家先發覺, 精彩內容都响第二隻vcd度.  故事講及男女主角, 由開頭御宅青年响[電車]度拯救被中年醉漢調戲嘅女主角, 斷估都覺得佢地係唔會响一齊, 因為無論年齡, 外貌, 背景, 佢地真係好似生活响唔同嘅世界裡面.  後嚟, 御宅青年為咗愛瑪仕而改變形象, 向net friends諮詢服飾, 餐廳, 紅酒, 以致每句說話, 所有所有電車男都好重視, 佢好驚佢响每個point都做得唔夠完美.  但當愛瑪仕睇到電車男因為搵唔到合適約會地點而焦慮, 突然失蹤而要向net friends求助, 覺得佢咁樣會好辛苦, 咁啱佢又要出國公幹, 正好俾個時間大家諗諗.

响依一個星期裡面, 電車男都好焦急, 仲有d氣餒, 但佢都為愛瑪仕選電腦, 而做晒詳盡嘅資料搜集, 之後攞埋俾愛瑪仕, 佢又無啦啦覺得自己同愛瑪仕有好多方面都唔夾, 發覺電車男原來同佢一齊會咁辛苦, 佢咪提議以後唔再見, 跟住電車男又無厘頭喊住咁走咗去.  後嚟, 經過戇直三劍俠, 難忘初戀嘅護士, 有隔漠嘅夫婦及隱蔽青年嘅鼓勵, 再次跑得好辛苦咁搵倒愛瑪仕, 女角都忍不住叫佢奸爸爹, [想知道對御宅青年嚟講, 向女生表白都唔係咁容易], 佢先至好唔容易將佢內心嘅說話"我愛你, 想與你永遠在一起"講俾愛瑪仕聽, 當佢一邊喊一邊表白嘅場面, 都真係幾感人, 後嚟愛瑪仕同佢講"我也愛你, 很衷心的愛你, 我們將長相斯守, 永不分離, 而且感到他的淚", 之後開始咀咀起來, 背景全以電腦數碼嘅效果嚟反映出响現今社會的另一類愛情故事.

其實, 電車男都可以好細心, 愛瑪仕覺得佢可以令一切平凡的事變得新奇, 亦令瑣事變成美好回憶.  佢果種傻得嚟都有d可愛嘅表情同行為, 最為深刻!  而佢地嘅交往, 都幾機緣巧合, 原來响佢地未曾認識前, 已經蘊釀緊d野, 聽起嚟都幾老套, 但緣份就係咁!!